اقىلبەكتىڭ «التىن» تاۋىقتارى

«ەڭبەك ەتسەڭ ەرىنبەي, تويادى قارنىڭ تىلەنبەي» دەگەن ناقىل ءسوز زەلەنوۆ اۋدانىنا قاراستى پەرەمەتنىي اۋىلىنىڭ تۇرعىنى اقىلبەك المانبەتوۆتىڭ ومىرلىك ۇستانىمى. ەڭبەكقور جىگىت ءوز قو­را-قوپسىسىنان شاعىن قۇس فابريكاسىن اشىپ ال­عان. كۇ­نىنە 80-90 جۇمىرتقا بەرەتىن فابريكا وسى كۇنى پايدا تۇسىرە باس­تاپتى. – بارباستاۋ جاعىندا تۇراتىن دوسىمنىڭ قۇس فابريكاسى بار, سوعان قاراپ ىلعي قىزىعىپ ءجۇ­رەتىنمىن. ءبىر كۇنى سوندا بارعان­دا, وسىنداي جۇمىستى مەن دە ىستەپ كورسەم, قالاي بولار ەكەن دەگەن ويعا قالدىم. ءسويتىپ, ۇيگە كەلگەن سوڭ تاۋىق تۇراتىن ارنايى ورىننىڭ قالاي جاسالاتىنىن عالامتور جەلىسىنەن قاراپ, ولشەمدەرىن شىعاردىم. بۇل با­عىتتاعى جۇمىسىمدى دوسىم دا قۇپتاپ, ماعان كوپ كەڭەس بەردى, – دەدى ول كاسىبىن قالاي باستاعانىن سۇراعانىمدا. بۇگىندە 100-گە جۋىق تاۋىق اسى­راپ وتىرعان شاعىن «فابريكا» يەسى جەكە كاسىپكەرلىگىن قۇرىپ, تاۋىقتارىنىڭ ءونىمىن وبلىس ور­تالىعىنا وتكىزەدى. – بۇل ءىستى باستاۋعا بار بولعا­نى 50 مىڭ تەڭگە قاراجات جۇمسا­دىم. تاۋىقتاردى ورالداعى قۇس فابريكاسىنان ساتىپ الدىم. با­سىندا نەشە ءتۇرلى قوسپا جەپ جامان ۇيرەنگەن تاۋىقتار اۋىردى. ول كەزدە جۇمىرتقالارى دا كو­ڭىلىمنەن شىقپايتىن ەدى. قازىر تاۋىقتارىم تازا ونىمگە ۇيرەن­دى. جۇمىرتقالارى دا جاقسى, – دەپ شاعىن بيزنەسىن باستاعان كەزدە­گى قيىندىقتارىن ەسكە الادى اقىل­بەك. كەيىپكەرىمىزدىڭ شاعىن «فاب­ري­­كاسى» ەلەك­تروندى تۇردە جۇ­مىس جاساپ تۇر­ماسا دا, ءونىمىن بەرىپ تۇر. تا­ۋىقتاردىڭ استىن تا­زا­لاپ, زالالسىزداندىرۋ جۇمىستا­رىن جۇرگىزىپ تۇراتىن جىگىت قىس كەزىندە اۋىل­دىڭ ءبىر ازاماتىن قا­سىنا كومەككە الىپ, ونى جۇ­مىسپەن قامتاماسىز ەتىپ وتىرا­تىندىعىن دا ايتتى. – جاسايمىن دەگەن ادامعا قاي كەزدە دە جۇمىس تابىلادى. تەك جالقاۋلىقتى ىسىرىپ قويىپ, وي­لاعان ءىسىن اياعىنا دەيىن جەتكىزۋ­دى كوزدەسە عانا بولدى. ال «ماعان اناۋ جەتپەيدى, مىناۋ از» دەپ سىل­تاۋراتا بەرسەڭ, ەشبىر ىستە بە­رەكە بولمايدى, – دەگەن ول بولا­­شاق­تا شاعىن قۇس «فابريكاسىن» كەڭەيتۋدى كوزدەپ وتىر. ەشكىمنىڭ قولداۋىنسىز, ءوز ەڭبەگىنىڭ ارقاسىندا با­لا-شاعا­سىن اسىراپ, باسقانى دا جۇمىس­پەن قامتىپ وتىرعان اقىل­بەكتەي ازاماتتاردىڭ ءىسى وزگە­لەر­گە ۇلگى بولسا ەكەن دەيمىز. تۇگەلباي بيسەن باتىس قازاقستان وبلىسى, زەلەنوۆ اۋدانى